Skóli

Ég geng í skólann, 15 mínútur hvora leið, á hverjum degi. Ég hlusta á I-pod á leiðinni, yfirleitt í íslenskri lopapeysu og strigaskóm. Þetta er greið leið- í raun sama gatan og ég bý í, nema hún skiptir um nafn miðja vegu. Já svona Kópavogsbraut-Kársnesbraut.

Á leiðinni geng ég framhjá manni sem brosir alltaf jafnblítt (hann er auglýsingaskilti í raunstærð og mér finnst hann alltaf vera alvöru manneskja). Ég býð honum góðan daginn í huganum. Ég fer framhjá nammibúð, nokkrum matvörubúðum, pizza-og kebabstöðum á leiðinni. Líka Ford-bifvélaverkstæði og verslun sem selur dýnur sem eru hannaðar fyrir MINN líkama. Svo þarf ég að ganga upp nokkrar tröppur og þá verður á vegi mínum stórt líkneski af Kristi á krossinum og hinum mönnunum- Ég þarf að taka mynd og setja þá félaga hérna inn.

Mér finnst gott að labba þessa leið- bæði til og frá, gefst tími til að hugsa á meðan.

Ég er í stórum bekk, við erum 25. Ég var í 5 manna bekk í LHÍ. Í bekknum er fólk frá Þýskalandi, Austurríki, Bandaríkjunum, Svíþjóð, Danmörku, Slóveníu, Belgíu, Króatíu, Ísrael, Tyrklandi, Spáni - þannig að við segjum bara ........ÁFRAM ÍSLAND! Líður reyndar svolítið eins og mjög stoltum fánabera sem gengur fyrir hönd sinnar þjóðar í fyrsta skipti inn á leikvang. Skólinn er stór- stúdíóin góð og mér líkar vel í tímunum. Það er gaman að vera í kringum svona marga einstaklinga frá ólíkum þjóðum. Og þetta verður mikil vinna, ég stefni á að fá sem mest út úr náminu og tímanum hérna. Ég er með minn skáp í skólanum og yoga dýnu- ég geymi líka ullarsokka í skápnum. Ég ætla að hengja upp eitthvað inni í skápnum- íslenskt já takk eitthvað.

Svo þarf ég að smyrja nestið mitt á kvöldin og gera það tilbúið, fá mér gott að borða og knúsa mig sjálf. Ég held ég sakni þess mest að fá fast knús eftir langan dag. En það lærist smám saman að knúsa sig sjálfur eins og allt annað. Ég tek bara einn dag í einu, einn dag í senn- í sátt við guð og menn ;)

K8.

Tungumálanámskeið I

Að verða vitni að því þegar tveir samkynhneigðir karlmenn, annar Rússi og hinn Svíi, skiptast á að kenna hvor öðrum að segja typpi, píka og ríða á sænsku og rússnesku, getur maður ekki annað en hlegið. - Og vissulega reynt að læra bæði sænsku og rússnesku útgáfuna!

Við erum öll eins inni við beinið einhvern veginn. Ég kenndi alltaf spænskum sundlaugarþjónum/barþjónum á mallorca í denn að segja "farðu í rassgat"- Hey, I´m only human.

K8

GrüS Got!

Ég hef velt miklum vöngum yfir þessu bloggi, þetta er jú viss heimildaskráning þannig séð. Um bullið í mér, lífið og tilveruna. Upp á síðkastið hefur það nú aðallega verið kexið á kálinu en það er víst á undanhaldi núna. Hef ákveðið að halda utan um námsdvöl mína í Salzburg, Austurríki- sem nú er ljóslifandi staðreynd, hér á þessum ljósvakamiðli. Ég ætla bara að hafa þetta á hér á kexinu, vil ekki stofna nýtt blogg, þetta tilheyrir jú allt saman mér og þá er bara eins gott að hafa allt á einum stað. Svo er það líka þannig í lífinu að maður byrjar ekki allt í einu "upp á nýtt", allavega ekki í mínu lífi- ég tek alla reynslu með mér áfram, reyni að læra af henni- en það tekst ekki alltaf. Svo lengi lærir sem lifir... (hversu lengi kemst ég upp með að skýla mér á bakvið það máltæki?!?).

Þetta er samt svolítið tricky því mér leiðast sjálfri svo mikið svona blogg þar sem hvert smáatriði er tiltekið- eins og dagbók. Þarf að finna leið til að gera þetta áhugavert.

Hhmmm... hux hux.

Vissar staðreyndir þurfa að koma fram samt sem áður t.d. að nú er ég að fara í dansnám hér næsta árið og ég bý á kristilegu gistiheimili fyrir stúlkukindur með stórri kirkju innandyra, kirkjuklukkum á þakinu og garðurinn minn er kirkjugarður. Þar er pabbi hans Mozart og fjölskylda hans grafin. Mjög miðsvæðis, nálægt gamla bænum og virkinu sem trónir hér yfir öllu. (Það þarf aðeins að lýsa stemningunni).

Ég er í túristaleik þessa dagana, skólinn er ekki byrjaður ennþá. Ég fór upp í virkið, sat og horfði á fjöllin í Þýskalandi og drakk bjór. Fór á safn. Fór í dómkirkjuna. Fór í aðra kirkju. Rosalega margar kirkjur hérna, ég kann vel við þær. Fór á bar. Fór á annan bar. Borðaði Bratwurst. Drakk Spritebjór. Drakk venjulegan bjór. Átti þynnkudag ;)

Þegar ég kem inn í búðir þá segir fólk "SKOTT!", sem ég hélt að væri nafnið Scott, en svo spurði ég eina afgreiðsludömuna hvað hún væri eiginlega að segja við mig "GrüZ Got!" sem væri þá "Heilsum Guði!". Þótti það nú svolítið kómískt. En maður á að spyrja þegar maður skilur ekki- öðruvísi lærir maður ekki.

Fólk talar iðulega við mig á þýsku- ég skil slatta en segi "Ich spreche nicht so viel Deutch jetzt" og þegar ég segist vera frá Íslandi er fólk yfir sig hrifið, sérstaklega ef það hefur komið þangað eða þekkir einhvern þaðan. Fólk lýsir veðrinu heima. Rigningunni sem fellur ekki lóðrétt heldur kemur úr öllum áttum með rokinu. Ahh..... súld og rigning, maður verður að elska þær systur. Ég fékk meira að segja gefins snýtuklúta frá einni konu því ég var frá Íslandi. Það eru allir mjög almennilegir. Og hjálpsamir.

Ég hengdi upp landakort af Íslandi.

Þú þarft að vita hvaðan þú kemur til að vita hvert þú ert að fara.

Ég bið að heilsa fjöllunum, sérstaklega Esjunni, Keili og Snæfellsjökli.

K8