Heilabrot

Ég spyr sjálfa mig þeirrar spurningar í gríð og erg hversu háa fjárhæð konan fór eiginlega með í Europris. Svarið við þeirri spurningu hlýtur þó að mæta afgangi.

K8

Skilyrðing

Lagið I miss you like crazy hljómaði í eyrum mér fyrir skemmstu. Það er svosum ekki í frásögur færandi nema fyrir þær sakir að það eina sem ég gat hugsað um var x-tra tyggjó. Án afláts hamraði sú tilhugsun á heilaberkinum. tyggjótyggjótyggjótyggjó.. I MISS YOU LIKE CRAZY ... .tygg.. tygg.. tygg. Það rann upp fyrir mér að ég hef ekki tuggið almennilega tyggjóklessu af áfergju síðan í janúar á því herrans ári 2006. Ég gat ekki hugsað um neitt nema x-tra tyggjópakkann... mmmmmmmmm... setja tvö honey-lemon upp í mig og tyggja, finna hvernig munnvatnskirtlarnir tækju kipp og dældu munnvatni inn í til að blanda klessuna. Setja svo þrjú tyggjó í viðbót upp í mig og jórtra svo rækilega. Tygg tygg tygg. Klára svo pakkann.

K8

Sjóndöpur stúlkukind eða kannski bara þreytt?

Það gæti reynst raunin að ég þyrfti að endurnýja glyrnurnar. Las fyrir skemmstu slóð inni á tölvu nokkurri og furðaði mig á því að þar hefði einstaklingur skoðað síðu með slóðinni bananatútturnar.com. Ég hló að þessu en komst svo að því að þetta hafði verið barnnáttúrunnar.com eða .is.

Það geta margir þættir orsakað þetta þ.á m. kaffileysi, svefnleysi, sjóndepurð, eða hreinlega óstjórnleg löngun í bananatúttur. Hvur veit?

K8

Mótmæli, já takk!!

Í gær leið mér vel. Í gær stóð ég vörð um samfélagslegt íbúalýðræði og strengdi borða þess efnis að ég mótmæli deiliskipulagi því er liggur fyrir um Kársnesið. SKIPULAGSSLYS Á KÁRSNESI, NEI TAKK!!

Ég sé það í hendi mér að senn mun nær öllu Íslandi verða sökkt í tilgangi virkjanna og annarra iðnaðarframkvæmda og vér sem eftir fljótum verðum öll nýir Íslendingar á landfyllingu sem nær svo langt vestur að það verður jafnvel tenging við Grænland. NEI TAKK!!

ÁFRAM MÓTMÆLI!!

K8

Hláturskastljós

Og ég leyfi mér að hlæja dag hvern...

Og það er gott að hlæja, hátt og snjallt, svo snarkar í umhverfinu líkt og í risastóru báli.

Bálið er stórt og bálið breiðist hratt út, líkt og eldur í sínu. Hlátursbál.

Þar sem logarnir dansa til og frá, í hláturskasti, og bjarminn af þeim er svo skær og heitur að leirburðurinn brennur upp á augabragði.

Og ég leyfi mér að hlæja dag hvern...

K8