Dagurinn í dag var frábær.

Af því að ég framkvæmdi það sem ég hugsaði. Einfalt. Basta.

K8

Allt þarf að komast út einhvern veginn

Það býr heimur innra með okkur- en hann er bara sýnilegur einni manneskju, þér sjálfum. Það þýðir ekki að hugsa endalaust inni í sér og gera ráð fyrir að umhverfið skilji hugsanir þínar, líðan og pælingar. Þú þarft að segja þinn hug, án þess geturðu aldrei átt von á því að verða skilinn- né heldur að á þig verði hlustað. Þú verður að tala út- þú verður að miðla sjálfum þér á skýran hátt. Orð eru svo máttug og megnug- og svo gjöful. Ég er að læra að tala.

K8

Snertiþörf

Mig vantar að knúsa fast, faðma þétt - finna hálsakot; mér yrði létt. Láta hjartastöðvar mætast. Langar að halda í hönd, - finna vin, finna bönd. Hugurinn myndi kætast. Líkami þreyttur er, vill fara í bað- þráir það.... en samt í sturtu fer. Þögul þörfin innra með mér öskrandi vill komast út.

K8

Holland..

...var vægast sagt áhugavert.

Konunglega skemmti ég mér, fræddist, upplifði, rautt, skoðaði, kynntist betur- ýmsu á meðan dvölinni stóð. Mikið var gott að faðma fast aftur- knús í hjartastöðina er ómetanlegt. Margar borgir- Amsterdam, Arnhem, Haag- vatn og síki, mmm....

Langt lestarferðalag- 12-14 tímar er áhugavert. Fólk er áhugavert. Að eiga samtal við ókunnugan um tilgang lífsins eftir svefnlausa nótt- í klefa sem er með bilaða miðstöð og er í raun fremur gufubað getur verið afar sérstakt. En maður kemst ekki neitt... maður á þetta samtal og þessi manneskja verður hluti af ferðalaginu.

Ljósbleik dögun, með fjólugrárri morgunþoku milli haustlitaðra trjáa... ljósbláir, túrkísbláir litir í bland á himninum líka. Fallegt sjónarspil- og með húðflúraðan rokkara- sessunaut sem spilar motorhead svo hátt í eyrunum á sér að ég heyri það í gegnum tónlistina mína... já, það er ákveðin stemning og ákveðinn sjarmi yfir því.

En tíminn líður hratt- vika liðin af nýrri lotu, nýir kennarar; ný verkefni. Tempus Fugit. Spennandi tímar og nýtt ferðalag á morgun- inn á Austurrískt heimili lengst í Ölpunum í vestri :)

K8